තක්කාලි | Tomato

තක්කාලි බීජ ටික හම්බුනේ තාම හැබැහින් වත් දැකල නැති යාලුවො දෙන්නෙක් ගෙන්. ඒ මීට මාස කීපෙකට කලින් .මේ වෙද්දි පැල වල මල්, පොඩි ගෙඩි ටිකකුත් තියනව.

 මේ කාලෙ මෙහෙට පායනව හිටු කියල. ඒ නිසා වතුර ප්‍රශ්නේ තමා ගොඩක් ම පැල වලට බලපාන්නෙ, පැල ඉක්මනටම වේලෙන්න බලනව,කොහොම හරි හදාගන්න තමයි උත්සහය.

හැමදාම උදේ නැගිට්ට ගමන් මිදුලට ගිහින් පැල ටික දිහා බැලුවම හරිම සතුටක් දැනෙනවා. වතුර බිල වැඩී කියල අම්ම කෑගහන එක තමා ඉවසන්න බැරි . :(  ඒත් අම්මටත් ආස හිතිලද කොහෙද දැන් පැල  වලට සාත්තු කරන්න පටන් අරන්.

මිරිස් වගාව‍ | Chilly Cultivation

මිරිස් වගා කිරීම ගැන උනන්දුවක් ආවෙ අපේ ගෙවල් පැත්තෙ මිරිස් වගා කිරීම සම්බන්දයෙන් ප්‍රොජෙක්ට් එකක් ක්‍රියාත්මක වෙනව කියල දැනගත්තහම.

නොමිලේම පොතිලින් බදුන් - මිරිස් බීජ දෙනව කීව නිසාම ආසාව තවත් වැඩි උනා. නිකන් දෙන එකේ හදලා බලනව කියල හිතුව.මිරිස් ගැන මම් කලින් ලිව්ව බ්ලොග් පෝස්ට් තමයි මේ තියෙන්නෙ ,

මිරිස් වගා කිරීම

මිරිස් තවාන් දැමීම   

මේ වෙද්දි එක සැරයක් මිරිස් කඩලත් ඉවරයි. මේ දවස් වල මෙහෙට ගොඩක් පායන නිසා පැල වලට ටිකක් සාත්තුව වැඩි කරන්නත් වෙනව.

මේ පැල පොඩිම කාලෙ
…

බීල නිදිද?

 

එදා සෙනසුරාද දිනයක් .සුපුරුදු පරිදි පොලට ගිහින් ඉරිදා පත්තරේයි කෙහෙල් ගෙඩියි අගුණ කොලයි ගන්ඩ  ඔනී නිසා යාලුවත් එක්ක ටවුමට ගියා.

ගිහින් එයාට ඔනේ අඩුම කුඩුම අරගන්නකම් පස්සෙන් ගිහින් බස් එකට  දාල පත්තර අරගන්න කියල පොල පත්තට හැරුන විතරයි ව0ගුවෙම මෙන්න සෙනගක් එකතුවෙලා ඉන්නව, හොම්බ දාල බැලින්නම් ගෑණු කෙනෙක් හෝටලයක් ඉස්සරහ පේව්මන්ට් එකේ වැතිරිලා.

බැලූබැල්මටම මට නම් හිතුනෙ මැරිලාවත්ද කියල. තව ටිකක් කර පොවල බලද්දි තමා අවුරුදු 2කට අඩු ඇති කියල හිතුන පොඩි එකෙකුත් ජාරා වෙච්ච් කලිසන් කොටයකුත් ඇදන් ඉන්නව දැක්කෙ.

ලමයගෙ අතේ කවුරුහරි දීපු පොඩි බිස්කට් පැකට් එකක්. විඩෙන් විඩේ ලමය අම්ම කියල හිතන්න පුලුවන් අර ගෑනු කෙනා ගාවට ගිහින් අතින් අදිනව, ඒ ගෑණුකෙනාට ගානක් වත් නෑ අඩුගානෙ හෙල්ලෙන්නෙ වත් නෑ. මම් නම් හිතුවෙම මැරිලා තමා කියල.

ඔය අතරෙ ස්ටෑන්ඩ් එකේ ඉන්න පොලිස් රාලහාමිල දෙන්නෙකුත් ආවා, එතකොට තමා ඒ හෝටලේ කොත්තු හදන බාස් කෙනෙක් කීවෙ, ඔය "ගෑණි හැමදාම ඔහොමයි හවසට බීල මෙතන බුදියනව, මේ ලමය කානුවෙ වැටිල ඉදල මේ දැන් ගොඩගත්තෙ" කියල. 

…ප්‍රධාන පාර දෙපැත්තෙ තියන කානුව ආවරණය කරල තිබ්බත් ඔය කියපු තැන පොඩි ඉඩක් තිබිල අර ලමය එතන්ට වැටෙන්ඩ ඇති.සෑහෙන ගැඹුරකුත් තියනව. වෙලාවට කවුරුහරි දැකල තියනව රෑක වැටුන නම්!... 

පොලීස් රාළහාමි වතුර ෙබා්තලයක් අරන් ඇවිත් අර ගෑනු කෙනාගෙ කටට වක් කරා. කොහෙද මැරිල වගේම තමා හෙල්ලෙන්නෙවත් නෑ නිදි.  වටේ පිටේ හිටපු අය ගෑනු කෙනාට බැන බැන යනව... ලමයා අම්මගෙ අතින් අදිනව ඇහැරවන්න හිතන් වෙන්න ඕනි. 

හැමදාම රස්සාවට යද්දි ඔය හෝටලය අහුකරන් ගියත් මේ වෙනකම් ඒ ගෑණු කෙනා අාය දකින්ඩ හම්බුනේ නෑ.

මම ආයෙත් | Started Dating Again - 2

හැබැයි කවදාවත්ම මට පළවෙනි එක්කෙනා ගැන තරම් දෙවෙනි එක්කෙනා ගැන ආදරයක් ඇති වුණේ නෑ, අඩුම තරමින් 50% ක් වත්. ඒ දවස් වල එයාට කෝල් දෙන එක ගොඩක් වියදම් අධිකයි, එයාට ඊමේල් තිබ්බෙත් නෑ.

හැබැයි හැම මාසෙම එයා එයාගෙ චූටි අත් අකුරු වලින් ලියාපු A - 4  කොළ කීපයක් මට තැපෑලෙන් එවුවා. මට දිග ලියුම් ලියන්න ඕනෙ වුනේ නෑ. ඒකෙන් වෙන්නෙ මගේ දුක වැඩි වෙලා, තනිකම , පාලුව වැඩිවෙලා මම ආපහු ලංකාවට යැවෙන එක. 

මම මෙහෙ තනි වෙලා නිසා, මට ඕනෙ වුණේ මේ රටෙන් සම්බන්ධයක් හදා ගන්න. ඒක නිසා මම එයත් එක්ක තිබ්බ සම්බන්දෙ නැවැත්තුවා.අන්තිමේදි මම ගොඩක් වයසෙන් අඩු කෙල්ලෙක් එක්ක යන්න එන්න පටන් ගත්තා. 

වයසෙන් වැඩි වෙද්දි එයා ගොඩක්ම වෙනස් වුණා.ඒත් අපි අවුරුදු කීපයක්ම එකට හිටියා. සමහර විට ඒ අපි දෙන්නම වැඩි කලබල නැති ගෙදරටම වෙලා ඉන්න කැමති අය හින්ද වෙන්න ඇති. 

සමහරවිට මෙහෙ දැන ඇඳුනුම්කම් අඩු හින්ද වෙන්නත් ඇති. හැබැයි ලොකුම හේතුව අපි අතරෙ  තිබ්බ ආර්ථික බැඳීමයි අපිට එකිනෙකාගෙන් හම්බ වෙච්ච උදව් උපකාරයි වෙන්න ඕනෙ. 

ඒකත් කාලයක් යද්දි අවසානෙ කරා ලගා උනා. ඊට පස්සෙ මට වඩා අවුරුදු කීපයක් වැඩිමල් විජාතික කෙල්ලෙක් එක්ක මම් සම්බන්ද උනා .අපිට ලොකු අනාගතයක් නැති බව හොඳටම දැනගෙන වුණත් මම එයාට ගොඩක් ආදරේ වුණා. සමහර විට අර පළවෙනිම කෙල්ලට ආදරේ වුණාටත් වඩා.මට ඕන වෙලා තිබ්බෙ ආදරේ...මට ලගින් ඉන්න කෙනෙක්...

ඒත් එයා මාව සෙල්ලමකට ගත්තා විතරයි.එහෙමත් නැත්තන් එයාට හැඟීම් ඇතිවෙනවා, නැති වෙනවා වෙන්න ඕනෙ. ඒත් නැත්තන් එයාට ඕනෙ වුණේ කායික සම්බන්ධයක් විතරක් වෙන්න ඇති.

හොද මිනිස්සු එක්ක ඉන්න බැරි ඇයි?

http://ourstorybeginsdotcom.files.wordpress.com/2012/02/32160016andrea-and-the-boys.jpg

ශශී අක්ක කියන්නෙ අවුරුදු 26ක් විතර වයස විවාහක කාන්තාවක්.ඒවගේම පොඩි දුවල දෙන්නෙක්ගෙ අම්ම කෙනෙක්.ජීවත් උනේ එයාගෙ මහත්තයයි පොඩි දරුවො දෙන්නයි එක්ක වෙනම ගෙදරක.ගෙදර සියළු සැප පහසුකමක්ම තිබ්බ.

ශශී අක්ක රස්සාවක් කරේ නෑ.දරුවො දෙන්න බලාගන ගෙදරට වෙලා හිටියා.මහත්තය කරේ බිස්නස්.ඒ කියන්නෙ හාඩ්වෙයාර් එකකුයි මෝටර් ස්පෙයාර් පාර්ට්ස් විකුණන කඩයකුයි තිබ්බා. විවේක වෙලාවට ශශී අක්කත් කඩේට යනව.ගොඩක් වෙලාවට බබාල බලාගන ගෙදරට වෙලා තමයි හිටියේ.

දන්නවද?අර ශශි අක්ක පැනලා ගිහින් කියන්නෙ ?

මොකක්?

ඔව් ආ...න් මිහිහෙක් එක්ක පැනල ගිහින්ලු.

නෑහ්...

නෑ නෙමෙයි ඔව්.ඒ දවස් වල දැයට කිරුළට කඩෙන් බඩු ගන්න ආව මිනිහෙක් එක්කලු ගිහින් තියෙන්නෙ.

???

එයාලගෙ  කඩෙන් බඩු අරන් තියනවලු ඒ මනුස්සයා...මෙයා ඒ ටිකේ  කඩේ ඉදලා තියෙන්නෙ.

ආහ්...

පස්සෙ හොයලා හොයලා ආයම ගෙදර එක්ක ඇවිත් ලු.

කවුද?

අය්යම ගිහින් එක්ක ඇවිත්, පොඩි උන් දෙන්න අඩනවලු අම්ම ඉල්ලලා.
ත්‍රීවීල් එකක එක්ක ඇවිත් තියෙන්නෙ,  අඩලා අඩලා ආයම අර මිනිහ එක්ක යන්න ඔනේ කියල ගිහින්ලු.

අප්පෝ...පව් පොඩි උන් දෙන්නා...අනේ මෙහෙමත් ගෑණු.පොඩි උන් දෙන්න අඩද්දී ඔහොමත් කරන්න පුලුවන්ද??? මුන් නම් අම්මලා නෙමේ....

හ්ම්ම්ම්...මොනව හරි ප්‍රශ්ණයක් තිබ්බද දන්නෙ නෑනේ.

ඒ අය්ය හොදයි කියල හැමෝම කියනව.මේ ගෑනුන්ට පින නෑ.හම්බකරල දෙනව නම් කාල ඇදලා ඉන්නනේ තියෙන්නෙ ආය රස්සාවලට යනව කියලද...

ම්ම්ම්ම්ම්...සැප වැඩිවෙන්න ඇති ඒකයි.සැප වැඩිඋනාමත් සමහරුන්ට ඉන්න බෑනේ.ඔන්න බීගන ඇවිත් ගහමරාගන්නව නම් ගුටි කාගන අඩාදොඩාගන යසට ඉදී...
 
හිහ් හිහ්... ඒක නම් ඇත්ත පවට පින් දෙන්න බෑ...

අසූ නමය අවුරුද්ද

මේ අවුරුද්ද මගේ ජිවිතේ ලොකු වෙනසක් කරපු අවුරුද්දක්,මගේ විතරක් නෙමේ අපේ පවුලේ, අම්මා,අප්පච්චී,අක්කා මේ හෑමෝගෙම.හරියටම ඒවෙද්දි මට අවුරුදු හතරක්,මට මතකෙ හෑටියට ලොරියක බඩුපටවගන අපි ටවුන් එකේ, අප්පච්චි කලින් හදල තිබ්බ ගෙදරට අවා.ඒකාලෙ මහ දරුනු කාලයක් කියල අම්මල කියනව,ඒ ගෑන නම් මට තියෙන්නෙ පොඩිම පොඩි මතකයක්.ගමේ ගෙදර දාල එන්න බෑරුව අම්ම ඈඩුව මට මතකයි.

ගම අතහෑරදාල නගරෙට එන්න ලොකුම හේතුව උනේ,අම්ම කියන හෑටියට ජෙවිපි කලබල තදේට ගමේ තිබ්බ නිසා,අනික අපේ ගෙදර අයටත් ලොකු කරදරයක් වෙලා.දවසක් රෑ කට්ටියක් ඈවිල්ල ගේ වට කරල සල්ලි ඉල්ලලා,තුවක්කු බිදින සද්දෙ අම්මට හොදටම ඈහුනලු.කෑගහන්න එපා කියල,සද්දකරොත් ඔක්කොම මරනව කියල.අප්පච්චිගෙ නම කියල එලියට අවොත් මරනව... තියන සල්ලි ඔක්කොම දීපන් ...කීවලු,අම්ම කිවෙ අපි දෙන්න(අක්කයි මමයි)පොඩියි,අනික රෑ නිසා හොදටම නිදිලු.අපි බයවෙලා කෑ ගෑහුවනම් මොනවයින් මොනාවෙයිද දන්නෙ නෑලු.

 අපේ අම්මයි අප්පච්චියි කරේ ඉස්කෝල ගුරු රස්සාවනේ,ඒ හෑටි සල්ලියක් තිබිලානෑ.ඒ අස්සෙ අම්ම ලොකු වීරකමක් කරල මරන්න හොයල තියෙන්නෙ අප්පච්චිනෙ,අපේ ලොකු අත්තත් ඒ දවසේ අපේ ගෙදර ඉදල,ඒ කියන්නෙ අපේ අම්මගෙ අප්පච්චී.ඒ දෙන්නම වී තියන කාමරේට දාලා වහල,ලොකු අත්තා වයසයි නේ,හොදටම වෙව්ලනවලු බයට,ඈයි ඉතින් මරන්න හොයනවනේ,ඒ අස්සෙ ගේ වටේට අඩි සද්දෙ,තුවක්කු කඩන සද්දෙත්.

අම්ම එකතුකරල තිබ්බ සල්ලි ඔක්කොම ගුලි කරල ශොපින් එකක දවටල ඈහුවලු, කොහොමද  සල්ලි දෙන්නෙ කියල,(පස්සෙ නම් කිවෙ අතට අහුවෙච්ච ටික දුන්න කියල බයටම) ජනේල කවුලුවකින් දාන්න කීවලු.අම්මා සල්ලි මිටියම කවුලුවෙන් විසික් කරල එලියට.කාටවත් මේගෑන කියල ඉබ්බොත් පවුලම මෑරෙන්න ලෑස්තිවෙයල්ල කියල උන් යන්න ගිහින්.අඩි සද්දෙ නෑතිවෙනකම්ම බලන් ඉදල අම්ම අප්පච්චීයි ලොකු අත්තයි එලියට අරන්.

 අපේ ගෙදර තිබ්බෙ ගමේ කොනක.එක පෑත්තකින් වෑව,අනික් පෑත්තෙන් කුඹුරු යාය.කුඹුරුයායට ඈතින් පෙනුනෙ කොක්කබේ කියන කන්ද.අම්ම කියනව මතකයි ඉස්සර කොටි හිටියලු ඒ කන්දෙන් එහාපෑත්තෙ.(කොටි ආව කතාව වෙනම දවසක කියන්නම් කෝ).ගෙදර තිබ්බෙ පොල් වත්තක මෑදට වෙන්න.අනිත් පෑති දෙකේත් ගෙවල් දෙකත් තිබ්බ ගොඩක් ඈතට වෙන්න.

 පෑය 2 - 3 ක් ගියාට පස්සෙ "අම්මෝ..."කියන සද්දයක් එක්ක වෙඩිපාරවල් කීපයක් ඈහුනලු ටිකක් ඈතින් වෑව පෑත්තට වෙන්න.අම්ම කියන විදියට ඒ වෙද්දි රෑ දොලහ පහුවෙලා.උදේ එලිවෙලා බලද්දි ගේ වටේටම සෙරෙප්පු අඩිපාරවල්ලු.ටික වෙලාවකින් ආරංචිවෙලා වෑව ලග ගමේ කොල්ලො දෙන්නෙක් මරලදාල කියල. අම්මලත් ගියාලු බලන්න අපිත් එක්කම.මටනම් ඒ හෑටි මතකයක් නෑ.වෑව අයිනේ පාරෙ තිබ්බ මිනීදෙක ලග ලියුමකුත් තිබ්බයි කියල තමයි ආරංචිය.දධුවමක් හෑටියට වුන මරනයක්!

 පස්සෙ දෑනගත්ත විදියට අපේ ගෙදරට ඈවිල්ල තියෙන හොරු, අල්ලපු ගමේ දන්න අදුනන මිනිස්සු කීපදෙනෙක්ලු.ඒකාලේ පුද්ගලික තරහ මරහ පිරිමහන්න එක එක දේවල් මුවාවෙන් හොරකන් කරාකියනවනේ.මේ සිද්දියෙන් පස්සෙ අප්පච්චි තිරනෙ කරල ගමෙන් යන්න.මොනව නෑතත් ජීවිත වටින නිසා.අම්මනම් වෑඩිය කෑමතිවෙලා නෑ.අම්ම බෑදල අප්පච්චිගෙ ගමට ආවට පස්සෙ තමයි ,අපි හිටිය ගෙදර හදල තියෙන්නෙ.අම්මත් ගොඩක් මහන්සි උනාලු ගේ වෑඩවලට.අම්ම ඉස්කොලෙ ඈරිල ඈවිල්ල අපිටත් කවල පොවල වතුර අදිනවලු ගේ හදන්න,අප්පච්චිත් එක්කම.

ගමෙන් එද්දි ලොරියෙ බඩු පටවගන ආව දවසනම් මට හොදට මතකයි.ගමේ හංදිය ලග ටයර් දාපු මිනියක් පිච්චෙනවා මම් දෑක්කෙ අප්පච්චිගෙ ඔඩොක්කුවෙ වාඩිවෙලා එස්සරහම සීට් එකේ ආව නිසා.ගමේ ගෙදර වහල දාල නගරෙට එන්න තිරනය කරප්පු අප්පච්චි නිසා අද අපි මිනිස්සු විදියට මෙහෙම ඉන්නවා.හොදම වෑඩේ කියන්නෙ නගරෙට ආවයි කියල බය හිතෙන සිද්ධිවලින් නම් අඩුවක් තිබ්බෙ නෑ,අක්කටයි මටයි.

මේ එක සිද්ධියක්,දවසක් අක්කයි මමයි ගෙදර ලගකඩේට යනව පාන් ගේන්න.තාම මතකයි ශොපින් එකක් අරන් කඩේදුවන හෑටි, මමත් ඔය වෑඩේට ආසයි,මොකද ඒ කඩේ තියනව රෝසයි සුදුයි ඉරීඉරි,වට්ටක්ක ගෙඩිවගේ සීනිබෝල,(මගෙ ප්‍රියතම කෑම).මට ඉතින් ඕවලින් කීපයක් හම්බවෙනව කඩේයන දාට. 

මෙන්න බොලේ කඩේ ලග මිනිස්සු පිරිල අපි දෙන්නත් මිනිස්සු අතරින් රිංගල ගිහින් හොට දාලා බෑලුවා.මොන බෑලිලිද? එතන හිටපු කෙනෙක් මේ පොඩිලමයි මොකද මෙතන...යන්න... යන්න...ගෙදර කියල අපි දෙන්න ගෙදර එලෙව්වා.පස්සෙ තමයි අප්පච්චි කිවෙ කොල්ලෙක් මරල ඔලුව බෑග් එකක දලා එල්ලලලු කඩේ ඉස්සරහ.ඒ අපේ රටේ එක අදුරු කාල සීමාවක්.

අක්ක 5 වසර විභාගෙට ලිව්වෙත් අප්පච්චීත් එක්ක ලොරියක නෑගල ඈවිල්ල.ඒකාලේ බස් අඩුයිනේ.අපෙ ගමේ ඉස්කෝලෙ  ලමයින්ට ඉදගන්න පුටු තිබිල නෑ.අම්ම අදටත් කියනව බිම ඉදගන ලියල මගෙ කෙල්ල පහේ විභාගෙ පාස් උනා කියල.

 කොහොමින් කොහොමින් හරි අසූනමය අවුරුද්ද ඉවර වෙද්දි අක්කට නගරෙ තියන මෑදි විදුහලට යන්න පුලුවන් උනා.මටත් හොද ඉස්කෝලයක් ලෑබුන.අම්මයි අප්පච්චියිත් නගරෙ ඉස්කොල දෙකක ගුරුවරු විදියට සේවය කරා. ඒ මගේ ජීවිතේට හොදම අඩිතාලම වෑටුනු අවුරුද්ද.

ආයෙත් කෙල්ලෙක්ද?

විවාහ උන බොහොමයක් දෙනාගෙ ඊලග බලාපොරොත්තුව දරුවෙක්!.විවාහ ජීවිතයක් සම්පූර්ණ වෙන්නෙ දරුවෙකුත් ලැබිලා දෙන්න තුන්දෙනා උනාම කියනවනේ.සමහරු විවාහ උන ගමන්ම දරුවො හදනව, සමහරු ටිකක් ප්‍රමාද කරල "එන්ජෝයි" කරල දරුවෙක් ගැන බලාපොරොත්තු වෙනව.

සමහරු කැමති ඉස්ඉස්සරලම ගෑණු දරුවෙක්ගෙ මූණ බලන්න.ඉස්සර වෙලාම කෙල්ලෙක් හම්බුනාම ගෙදරට වාසනාවන්තයිලු.ගොඩ දෙනෙක් එහෙම කියනව.එහෙම මතයක් ඇති වෙන්න ඇත්තෙ ඉස්සර කාලෙ පවුල් වල ගොඩක් ලමයි ඉන්න නිසා ලොකුම ළමය අක්ක කෙනෙක් උනාම අම්මා වගේ අනික් දරුවො බලාකියා ගන්න,ගෙදර වැඩපළ වලට අත් උදව් දෙන්න පුලුවන් වෙන නිසා වෙන්නැති.

මුලින්ම ගෑණු ලමයෙක් ඉපදුනොත් ඊලග බබා පුතෙක් උනොත් හොදයි කියල ගොඩක් අය හිතනව.දෙජාතියෙන්ම ඉන්නවනේ එතකොට:).

මට මතකයි ඉස්සර අම්ම කියනව අක්ක ඉපදිලා අවුරුදු 4කට පස්සෙ මම් හම්බෙන්න ඉද්දි අප්පච්චි ගොඩක් ආසාවෙන් හිටියලු සැරේ මේ නම් කොල්ලෙක් තමා කියල,"මිගාර" කියල නමකුත් හදාගන හිටියලු.ඒත් ඉතින් කෙල්ලක් කියල දැනගත්තට පස්සෙ ටිකක් විතර දුක හිතිල.පස්සෙ කාලෙක මම් ඔය ගැන අහපුවම අප්පච්චි කිව්වෙ ඉගනගන හොදට හැදෙනවනම් කෙල්ලොම උනාම මොකද කියල.

කෙල්ලොම ඉන්න පවුල්වල කෙනෙක්ට බබෙක් ලැබෙන්න ඉද්දි එයාල හිතන්නෙ කොල්ලෙක් ඉපදුනොත් හොදයි කියල ,මොකද ඒ පවුල් වල කොල්ලො නෑනේ.ඉතින් ගොඩක් ආසයි කොලුපැටියෙක් ඉපදෙනව නම්.

මේ කෙලි ලබ්බියො ගොඩක් හිටියට වැඩක්ද කොලුපැටියෙක් නැතුව...හදිසියකට කඩේකටවත් යවාගන්න පුලුවන්ද?...රෑක අසනීපයක් උනා...ත්‍රීවීල් එකක් ගේන්න යන්න පුලුවන්ද?...කෙල්ලොම ඉන්න ගෙවල් වල සමහර අම්මලා,ඔන්න ඔහොම කතා කියනව මට අනන්තවත් ඇහිලා තියනව.

කොල්ලො ගොඩක් ඉන්න පවුලක කෙනෙක්ට බබෙක් ලැබෙන්න ඉන්නව නම් ආසාවෙන් ඉන්නෙ කෙලිපැට්ටෙක්ට.ඒ ගොල්ලො හිතන්නෙ කෙල්ලක් ඉන්නව නම් ගෙදරට කොච්චර වාසනාවක්ද කියල.ලස්සනට අන්දලා හැඩ බලන්නත් පුලුවන්නේ.කොල්ලොන්ට කොච්චර කරත් අන්දන්න පුලුවන් කලිසම් ශර්ට්/ටීශර්ට් විතරනේ.කෙල්ලොන්ට එහෙමද? එක එක විදියේ වයිවාරන්න ඇදුම් පැලදුම්.

මේ දවස් වල අපිත් දෙවනියා එනකම් මග බලාගන ඉන්නව,කලින් එකා (මේ ඉන්නෙ කලින් එකා) දුවෙක් නිසා හැමෝම බලාගන හිටියා මේ සැරේ පුතු පැටියෙක් උනොත් කොච්චර හොදයිද කියල.ඒත් දොස්තර මහත්තයා කිව්වෙ "most probably a girl! " කියල.නැචුරල්ගෙ අම්ම නම් කිවෙ කවුරු උනත් කමක් නෑ මට නම් කියල.ආය අහක දාන්නැයි නේ.?මට නම් පොඩි දුකක් හිතුන.

නැචුරල්ටත් ඔනේ උනේ "කොල පාට මල්ලි කෙනෙක්".එයා කිව්වෙ එහෙම.ඒත් ජීවිතේ කියන්නෙ බලාපොරොත්තුවෙන දේම සිද්ද වෙන එක නෙමේනේ.ඒ නිසා දුක් වෙලා වැඩක් නෑ,ලැබෙන දේ සතුටින් බාරගන්න ඕනේ.

මේ අවුරුද්දෙ අප්‍රේල් 12,ඒ කියන්නෙ අලුත් අවුරුද්දෙ අපේ ගෙදරට අලුත් අමුත්තෙක් එනව,ඒ නැචුරල්ගෙ චූටි නංගිබබා.අපි ඔයා එනකම් මග බලාගන ඉන්නෙ.අක්කත් ඔයා එනකම් මග බලාගන ඉන්නවා.එයා පොඩි කාලෙ ඇදපු ඇදුම් ඔයාට දෙන්න,අන්දලා හැඩ බලන්න ,ඔයත් එක්ක බැලුම් බෝල සෙල්ලම් කරන්නත් බලාගන ඉන්නව!... 

 

සීයා තමයි සීයා

http://blogs-images.forbes.com/carolynrosenblatt/files/2011/11/25046227.HappyOldMan.jpg

දන්නවද වැඩක් ?

මොකද්ද?

එහා ගෙදර සීයට ගෑනියෙක් ඉන්නවලු.(සීයගෙ කසාද බිරිද මිය ගිහින් දැන් අවුරුදු 20කට වැඩී)

අනේ යනව ඕයි යන්න මිනිස්සුන්ට අපහස කරන්නෙ නැතුව.හරියට දැක්ක වගේනේ කියන්නෙ.

දැක්ක කෙනෙක් තමා කිව්වෙ?

කවුද?

අර ඉස්සරහ ගෙදර අක්කා.

එයාටත් වෙන වැඩ නෑනේ ගෙවල් වලට එනඅය කවුද කතාකරන අය කවුද කියල බලබලා රිපොර්ට් කරන්න.

නෑ නෑ ඇත්තලු.

හ්ම්...

........................

ඇත්තද අර එහා ගෙදර සීයා ගෑණියෙක් එක්ක හුටපටයක් තියනව කියන්නෙ?

ආ... ඔව් ඔව්, ඔය කියන්නෙ කට්ටිය.

එහෙනම් ඇත්ත වෙන්නැති.අර සුජානි අක්කලාගෙ ගෙදර ලග සි‍යඹලා ගහයට දවසක් ගෑණු කෙනෙක් එක්ක කතා කරකර හිටියා මම් දැක්ක.ගෑණිට නම් එච්චර වයසකුත් නෑ 50කට අඩුයි මම් හිතන්නෙ පෙනුම.මමත් ඉතින් උවමනාවෙන් බැලුවෙ නෑ. ඕං කොල්ලෙක් කෙල්ලක් කතා කරකර හිටිය නම් හොදට මතක හිටිනව.:)

සීයටත් දැන් 79ක් 80ක් විතර ඇති? 

ඔව් ඒවගේ ඇති තමා.

නාකි වෙලා බණක් භාවනාවක් කරගන ඉන්න පින නෑ මේ මිනිස්සුන්ට,තියන පව්කාරකමක් හැබෑට.

......................

සුනිල් අය්ය සීයට කේස් එකක් දාලලු නේද?(සුනිල් අය්ය-සීයගෙ බෑනා)

මොන?

අර සීය එක්ක යාලුවෙලා ඉන්න ගෑණි ගෙදරත් ඇවිත් කතා කර කර ඉන්නවලුනේ. සුදූට කියනව කියන්නෙ සීයා, ඒ ගෑණිට තේ එහෙමත් හදලා දෙන්න කියල.(සුදූ- සීයගෙ දුව).

නෑ...එයා ඉතින් මොනව කරන්නද?නාකි වෙලත් මේ මිනිස්සුන්ට තියන අමාරුවක්.

දවසක් ඔහොම කතා කර කර ඉද්දි සුනිල් ඒ ගෑණිට ගහලා එලවලා.

ඈ...හිහ් හොද වැඩේ නාකි මනමාලකම් කරන්ඩ යනවට.

එදයින් පස්සෙලු ඔය සියඹලා ගහ ලගට ගිහින් හම්බ වෙන්නෙ දෙන්න.

හිකිස්...

.......................

මේ ලගදි සීය කඩේට ගිහින් සිගරට් අරන් එන්න.

සීය සිගරට් බොනවද ??? මම් දැකලා නෑනේ.ඉතින්?

කාලයක් නවත්තලා තිබ්බ ඔය දැන් බොනව කියන්නෙ ආයෙත්.

ම්ම්....

කඩේ ගිහින් එද්දි වැටිලා.අමාරු වෙලා දවස් කීපයක්ම ඇදටම වෙලත් හිටියලු.

අහ් අපි දන්නෙවත් නෑ.

සුදූ කිව්වෙ, ඒ දවස් වල සීයගෙ ෆෝන් එකට කොල්ස් එනවලු හිටු කියල.ගෙදර අයට කාමරේටවත් එන්න දෙන්නෙ නෑලු නේ...

හැබෑට.???

ඔව්, ඔය කියන්නෙ.දොස්තර බෙහෙත් ගන්න යන්නත් සල්ලි තිබිල නෑ.සල්ලි දීලා තියෙන්නෙ රුවිනි නංගි.(සීයගෙ මිනිපිරී).නැත්තම් ඉතින් සුනිල් අය්යට කියල වියදමට සල්ලි තියන එකක්යෑ.,ඒ මිනිස්සුත් අමාරුවෙන්නේ ජීවත් වෙන්නෙ.සුදූ කියන්නෙ සීය ලග සල්ලි කීයක්වත් නෑලු.පෙන්ශන් එක ගත්ත ගමන් අර ගෑණි එනවලු සියඹලාගහ යටට ඒක අරන් යන්න.

හික් හික්.

..............................

ඒකයෑ...මේ ලගදි මම් වසන්තත් එක්ක ගියා බැංකුවට.(වසන්ත- හන්දියෙ ට්‍රීවීල් ඩ්‍රයිවර් )මගදි සීයා දැකලා මං, ආ...අර සෙනවිරත්න මාමා නේද? කියල ඇහුව මෙන්න මේ මනුස්සයා ඔලුක්කොවට වගේ හිනා වෙලා කියපි, දවසක් මං හයර් එකක් ගිහින් එද්දි ඔය මනුස්සය  කවුද ගෑණු කෙනෙක් එක්ක ඇවිත් නැංග,ගිහින් දාන්න කිව්වෙ අර .... ඉන් එකට.ගිහින් දැම්ම.මට මොකෝ,පස්සෙ මට ගාන ලැබුන ඉතින්. හහ්..හහ්...හා...

  

ඈ...මෙහෙමත් මිනිස්සු!

  

ඒ මිනිහව රවට්ටගන පැන්ශන් පඩිය ගන්ඩ ලෑස්තිවෙලා ඉන්නව ඇති ඒ ගෑණි.ආය වෙන මොකටද? මෙහෙමත් ගෑණු.

අනේ හෑබෑට කොන්දත් කුදු කරගන මග යන්ඩ පන නෑ,ඒ උනාට මේ මිනිස්සුන්ට තියන අමාරුවක්!

එක අතකින් ඒ මනුස්සයගෙ කැමැත්ත,වියදමත් ඒ මනුස්සයට.එයාට හොදනම් අපිට මොකෝ නේද?

ඒත් ඉතින් ලැජ්ජ නැද්ද අර දීග දෙන වයසෙ මිනිබිරී කෙනෙකුත් ගෙදර ඉද්දි මේ නාකි ලොක්කලා නාඩගන් නටනව.

නජීම්

ගේට්ටුවෙ සද්දයක් ඇහෙනව නේද?

කවුද කියල බලනවකෝ වාඩි වෙලා ඉන්නෙ නැතුව, මම් මේ බබාගෙ ඇදුම් අයන් කරනව...

කාමරේ ඉදලා අක්ක හයියෙන් බෙරිහන් දෙනව.

නිල්පාට කොටු කොටු සරමක් ඇදලා දිරච්ච කමිසයක්  ඇදගත්ත මැදිවයසේ කැහැටු පිරිමියෙක් ගේට්ටුව ඉස්සරහ.

ආහ් නජීම්!... 

මූණපුරා රෑවුල වවාගන,වෙනදා වගේ කකුලක් ඇද ඇද ගේට්ටුව ඇරගන එනවා...

අම්මා ඉන්නවද...?

ආ... ඔව් නජීම්... එන්ඩ.

සෙරෙප්පු දෙකක්වත් නොදා දූවිල්ලෙන් පිරිලා තිබ්බ යටිපතුල් දෙක, ගේ ඉස්සරහ තිබ්බ පාපිස්සෙ උලලා උලලා,නජීම් සාලේ කොනේ තිබ්බ පුටුවක වාඩිඋනා.

අම්මේ!....අම්මේ!....

නජීම් ඇවිල්ලා... 

ආ...නජීම්!...දැක්ක කාලයක් හැබෑට?කතාකරන්ඩවත් විදියක් නෑනේ...ෆෝන් නොම්බරයක් වත් නෑනේ...

ඉතින්?...

අම්ම නජීම් එක්ක කතාවට වැටුනා,වෙනද වගේම මමත් පැත්තක ඇනතියාගන ඒ කතාවට ඇහුම්කන් දුන්න.
 

හෙහ්...වරදක් නෑ...ඔහෙ ඉන්නව!...

කුඹුරු වැඩ කොහොමද?

මේ සැරෙත් වතුර මදි උනා...,එච්චරම සරුවකුත් නෑ....

අපේ ඒව කොහොමද දන්නෙ නෑ...? බලන්ඩවත් යන්ඩ බැරිඋනා නජීම්...

පාර ළග කුඹුර නම්  හැම සැරේම පැහෙන එකනේ... මේපාරත් හොදයි.ඒකට නම් වතුර තියනව...නුගගහ අක්කරේට වතුර මදි උනාලු කිව්වෙ,මට එද්දි ඇඩ්ඩින් හම්බුනා...,ඇවිත් යන්ඩ එන්නම් කියල කියන්ඩ කිව්වා...

හ්ම්...

අපේ නංගි ඉස්පිරිතාලෙ නැවැත්තුවා...කහටද්දිලියේ මහ ඉස්පිරිතාලේ ඉදලා මෙහෙ දැම්ම...

ආහ්...ඒ මොකද?

කොන්දේ අමාරුවක්...ටිකක් අමාරුයි කිව්ව හින්දා අරන් ආව මෙහෙ. පරීක්ශණ වගයක් කරන්ඩ තියනව කිව්ව.

ම්...නංගි බැදලත් නෑනේ?

බැන්ද...

නංගි බැන්දද...? අපි දන්නෙවත් නෑනේ....

බැන්ද,ඒක දැන් අත් ඇරිලා වාගේ තමා ඉන්නෙ.නංගි ඉන්නෙත් අපිත් එක්ක...

නජීම් ඉතින් ඔය හැමදේම බලනව,එතකොට නෝනා...?

ඉදලා හිටලා කතා කරනව.එකසැරයක් ඇවිල්ලත් ගියා,මාත් එක්කත් රන්ඩුවෙලා කියන එක අහන්නෙ නැතුවනේ ගියෙ.

එහෙනම් සල්ලි එවනව ඇති?

මුලින් මුලින් එව්වා...ඇවිත් ගියාට පස්සෙ  තාම නෑ.දැන් මාස 2 - 3ක් ම වෙනව.

ළමයි ?

ගෙදර...,අපේ අම්ම ඉන්නවනෙ බලාගන්ඩ,නංගිත් ඉන්න හින්දා මේ ටිකේ අවුලක් නෑ...

ආ...එහෙනම් හොදයි!.

තේ ටිකක් බීල ඉන්ඩ නජීම්!...

හ්ම්... 

හදලා දුන්න කිරිතේ එක නජීම් එක හුස්මට බීගන බීගන ගියා.

මේ ලගදී පොලිසියෙන් ආවනේ...ගෙදරට.

ආ...ඒ මොකද?

ලෙඩ ලමයා තනියම ගෙදර දාල යනව කියල කවුද පොලිසියට කියල, කුඹුරු වැඩට යනවනි.

අම්මයි නංගියි ඉන්නව කිව නේද? 

අම්මත් දැන් වයසයි ඇහැපේන්නෙත් නෑ.නංගිට ඇවිත් සතියක්වත් නෑ...ඊට කලින්...

ඉතින්?...

පොලිසියෙන් ඇවිත් ලියාගන ගියා.

කලින් ඔය දුව මෙහෙ ඉස්පිරිතාලෙටත් ගෙනාව නේද?

ඔව්,හරි ගියෙ නෑනේ.කන්නෙ නෑ...දියර ජාති බොනව.හිට්ටවල තිබ්බොත් ඉන්නව ඇවිදින්ඩ බෑ.

හ්ම්...

ඔහොම තමා ඉතින් ජීවිතේ ගෙවෙන්නෙ,කුඹුරු කෙරුවෙ නැත්තන් ලමයිට කන්ඩ නෑ,ගෙදර ඉදලා හරියන්නෙ නෑනේ.ගම් පැත්තේ ආවොත් එන්ඩ, මම් වැව් බන්ට් එක සුද්ද කරනව,ලූල්ලු නම් පොඩි උන් ඉන්නෙ,තෙප්පිලි වේලනව මේ දවස් වල.

ආ...ආවොත් එන්නම්කො.

අනේ නජීම් තරහ වෙන්ඩ එපා,පුංචිඅය්යගෙ පුතාල කීපසැරයක්ම ඉල්ලපු නිසා මේ කන්නෙ කුඹුරුටික එයාලට දුන්න.

මටත් වි මිටි 6ක් තියනව නෝනට දෙන්ඩ,ඉතුරු වෙච්ච රුපියල් 10,000 මේ කන්නෙ වී විකුනපුවහම දෙන්නන්.ඒ ටික කියන්ඩත් එක්ක තමා මම් මේ ඇවිත් යන්ඩ ආවේ.

හ්ම්...නජීම් කුඹුරු කරන කොට වී ටික හරියට දෙනවනේ...,වී ටික පුලුවන් නම් දෙන්ඩ මට සල්ලි ඕනේ නෑ.

ඒක කිව්ව විතරයි,නජීම් ගේ මූණට ලා හිනාවක් ගියා.

එහෙනම් යන්නන්,පරක්කු වෙන්ඩ බෑ.දෙකට බස් එක අල්ලගන්ඩත් ඕනේ...

පොඩ්ඩක් ඔහොම ඉන්ඩ නජීම්....!

අම්ම කුස්සිය පැත්තට ගියා...,මාත් ඒත් එක්කම අම්මගෙ පස්සෙන් වැටුනා...

ගෙදර ගෙනල්ල තිබ්බ බිස්කට් පැකට් එකකුයි, බබාගේ චොකලට් පෙති ටිකකුයි, අම්ම පාර්සලයක් වෙන්ඩ හැදුවා.

ආ නජීම්...පොඩි දුවට ගිහින් දෙන්ඩ...!

මට මතක් උනා එකාපාරටම දවසක් නජීම්ගෙ ගෙදර අපි ගිය වෙලාවක ජනෙල්,දොරවල් අතරින් එබුනු ලමයි රොත්ත.ඔක්කොම 10 වත් ඇති,පඩිපේළියක් වගේ. 

ඊයේ ගියා  අල්ලපු ගමේ කුලී වැඩකට වත්තක් සුද්ද කරන්ඩ.

පන්සලේ බණ...හාමුදුරුවො කෙනෙක් කියනව අපි කරපුවා විදවල ඉවර වෙනකම් මැරෙන්නෙ නෑලු...!

අපේ තාත්තා මැරුනේ 48න්.මට දැන් 40ක්.තව කොච්චර ඉන්ඩ වෙයිද...?

හිහ් නජීම් දැන් බණත් අහනවද?

නෑ,ඒ වත්ත අල්ලපු වැටේනේ පන්සල,එදා පෝයට හාමුදුරුවෝ බණ කියනව ඇහුනා.

කුමාරි

කුමාරි හිටියෙ අපේ අල්ලපු ගෙදර,දැන් ඒ ගෙදරිනුත් කුමාරි ගිහිල්ල ගොඩාක් කාලයක් වෙනව,මම් හිතන්නෙ අවුරුදු 10ක් විතර.

කුමාරි ඒ ගෙදර ඇවිත් හිටියේ අපි හිටපු පළාතට ගොඩක් දුර පළාතකින් නෙමේ.පැය 2කක විතර ගමනකින් එයාගේ ගම් ප්‍රදේශෙට යන්න පුලුවන්.

අල්ලපු ගෙදර ඉන්න කාලේ, ඕනේ නම් කුමාරිට වයස අවුරුදු 11ක් හෝ 12 විතර වෙන්න ඇති.

ඒ දවස් වල ඒ ගෙදර වත්තේ අයිනට වෙන්න හදලා තිබ්බ  ලිද ලග කුමාරි උදේ පාන්දරම දකින එක සාමන්‍ය දෙයක් උනා.

තඩිම තඩි රෙදි බේසම් දෙකක් විතර තියාගන උදේ වරුවේ සෑහෙන වෙලාවක් යනකන් කුමාරිගේ වැඩේ ගලේ ගහ ගහ ඒ ගෙදර අයගේ රෙදි හෝදන එක.

පාන්දරම කුමාරිට කරන්න නියම වෙලා තිබ්බෙ ඉදලත් අරන් ගෙදර වත්ත අතුගාන එක.ඊට පස්සෙ තමා රෙදි සේදීමේ කාරියට බහින්නේ.

කුමාරි කළුයි,තලෙළුයි කියන්න බෑ,ඇත්තටම කළුයි.තිබ්බෙ ගොඩක් කෙට්ටු ශරීරයක්.

හිතාගන්නවත් බෑ එක දවසකට එච්චර රෙදි කන්දක් කොහොම හෝදනවද කියල .

එයාට කලුම කලු කොන්ඩයක් තිබ්බ,කොන්ඩෙ කපල තිබ්බෙ "නෑබිලි කට්" එකක්.

දවසක් මම් කුමාරිව දකිද්දි එයාගේ කොන්ඩේ හිස් මුදුනේ ඉදන්ම සුදු වෙලා.මට මේක සෑහෙන ප්‍රශ්ණයක් උනා.

මොකද කුමාරි ඔය කොන්ඩේ???...

කුමාරි සුදුම සුදු පාට දත්ටික  පෙන්නල හිනා උනා...

එයාගේ දත් එච්චරම සුදු පාටට පේන්න ඇත්තේ ඇගේ පාටත් එක්ක දත් වලපාට කැපිලා පෙනුන නිසා වෙන්නැති කියල මට හිතුන.

මගෙ ඔලුවේ උකුණෝ...

ඉතින් ඔලුව සුදු උනේ???

උකුණෝ ඉන්න හින්ද නෝනා **තියන් ඉස්සා,...රෙදි හෝදන ගමන් කුමාරි උත්තර දුන්නා...

ඔළුවට....???

එහෙම කාලයක් යනකන් කුමාරි සුපුරුදු පරිදි ඒ ගෙදර වැඩ කටයුතු කරගන හිටියා.කාලෙකට පස්සෙ දැක්කෙ නැතුව ගියා.

ඒ ගෙදර හිටිය මගෙ වයසෙම යාලුවෙක්,දවසක් මම් ඇහුව මොකද කුමාරි පේන්න නැත්තේ කියල.

කුමාරිව ගෙදර ඇරලුවා...එච්චර වැඩකුත් නෑනේ... මෙහෙ තියාගන ඉන්න එකේ තේරුමක් නෑ!...

පස්සෙ ආරංචි උනා...අවට කෙනෙක් පරිවාසෙට දන්වලා,...පොඩි ලමයෙක් ඒ ගෙදර වැඩ කරනව කියල,ඒ නිසා තමයි කුමාරිව ගෙදර යවල තියෙන්නේ.

ඊට අවුරුදු 4කට 5කට  විතර පස්සෙ අපි ගෙවල් අවට කට්ටිය එක්ක ගියා සෝමාවතිය,දිඹුලාගල වැදපුදාගන්න.

දිඹුලාගල ගිහින් එන අතරමගදී අල්ලපු ගෙදර අන්කල් අපි ගියපු වාහනේ පොඩ්ඩකට නවත්තන්න කියල බැහැලා ගියා.

ගිහින් ගොඩ උනේ පාර අයිනේම ඈතට වෙන්න තිබ්බ පොඩි  ගේ පොඩ්ඩකට....පොල් අතුවහල මැටි ගහපු ගෙයක්,හරියට පොඩි මඩුවක් වගේ...

අපි අන්කල් එනකම් වාහනේටම වෙලා බලාගන හිටිය...තද පෑවිල්ල නිසා එළියකට බහින්ඩ තියා හිතන්නවත් බෑ.

අව් කාශ්ඨකේ...වේලිච්ච හුලං එක්ක එන දූවිලි ඇස් වලට රින්ගන්ඩ හදනව.

ටික වෙලාවකට පස්සෙ අන්කල් ආවා ...

කුමාරිලාගේ ගෙදර!... මම් ගියා බලලා එන්ඩ කියල ,කුමාරි දැන් බැදලා ලමයෙකුත් ඉන්නලු....මෙහෙ නෑලු දැන්...

එච්චර වයසක් තිබ්බද කුමාරිට??

මයෙ හිතේ දැන් 16ක් විතර ඇති.

ඌව වෙල්ලස්ස විශ්ව විද්‍යාලය

ඌව වෙල්ලස්ස විශ්ව විද්‍යාලය කියල කියන්නෙ ලංකාවෙ  14 වෙනි ජාතික විශ්වවිද්‍යාලය.2005 වසරේදී තමයි විශ්ව විද්‍යාලයට මුල් ගල තියල තියෙන්නෙ. 2006 වසරේ ඉදලා සිසුන් ඇතුලත් කරගන තියනව,මේ වෙද්දි මුල්ම බැච් එකත් පාස් අවුට් වෙලා.

මේ තියෙන්නෙ මම් ගත්ත පින්තූර නම් නෙමේ,මම් ලග අවුරුදු කීපයක් තිස්සෙ එකතු කරන් තියාගන ඉන්න පින්තූර එකතුවෙන් කීපයක්.ඌව වෙල්ලස්ස විශ්ව විද්‍යාලය ගැන වැඩි තොරතුරු බලාගන්න පුලුවන්, විශ්ව විද්‍යාලයේ වෙබ්සයිට් එකෙන්, මෙන්න මෙතනින්.

ප.ලි: මේ පින්තූර අරන් තියෙන්නෙ 07'බැච් එකේ පරිඝනක විද්‍යාව හා තාක්ශණය හදාරන මදුරංග මල්ලි,පින්තූර වල සම්පූර්ණ අයිතිය එයාගෙ,ඒ නිසා ඔන්න එයාගෙන් අහල කියලම දැම්මා.මෙන්න කැම්පස් එකේ තවත් පින්තූර තියනව,මේ එයාගෙ වෙබ් ඇල්බම් එක. ගිහින් බලන්නකො.

මේ තියෙන්නෙ A බ්ලොක් එක

මුල්ම කැන්ටීන් එක

මීදුම පැතිරී ගිහින්

මේ C බ්ලොක් එක

කන්ද උඩ හොස්ටල්

මේ තියෙන්නෙ Special Computer Lab(SCL)එක

මේ Main Computer Laboratory(MCL) එක

නිවාඩු පාඩුවෙ කතාබහ කරන්න,කුප්පි දාන්නත් හොදයි මෙතන

මීදුම වසාගන්න ඔන්න මෙන්න

C බ්ලොක් එක

ඇඩ්මීන් බිල්ඩිම ආසන්නය

C බ්ලොක් එක

බදුල්ල පස්සර පාරට මුහුනලා නිමවා ඇති විශ්ව විද්‍යාල නාම පුවරුව

අර ඈත පේන්නෙ හොස්ටල්

රෑවෙලා

ඇඩ්මින් එකේ ඉදලා ලෙක්චර් හෝල්ස් පැත්තට

පරණ ලයිබ්‍රි එකට යන පාරනෙ මේ තියෙන්නෙ

ලෙක්චර් හෝල්ස් ඈතට පේන්නෙ

ඇඩ්මින් එකේ ඉදල ඔය ඈතින් පේන්නෙ බදුල්ල ටවුන් එක.

අපි හිටපු හොස්ටල් එක (Silver Tips)